Duhlai tia min koh mai le

Laikhum zala ka dawn pawhin,
​A mak e, hril, sawi har ka ti;
Tawnmangah tal pheichhampa nen,
Kan lo tawng ta tak kha em ni?
Engtin nge maw nang mihrang hian,
"Duhlai" tia min koh mai le!

Mim ang kan piang hmun ta si lo,
Chi leh kuang kan inhnai hek lo;
I chunnu leh ka zuapa lah,
Lai an innat kan hre hek lo,
Engdang vang a ni lo, lungrun,
Khuanuleng tuah ngei kan lo ni,
Ka lam hawia i seih hianin,
Ka tan khuavel a par leh thin.

Thu ropui ber induhtawnna,
Kan hril dun ve ni kha, lungrun;
A takah chuan a hlu lua a,
Ka tawnmang emaw ka lo ti,
Hrilh ka nghakhlel ka chun leh zua,
Chinlai lenrual zawng lakah pawh.